Ao longo das últimas semanas, o Concello de Oleiros desenvolveu nos centros de educación primaria municipais unha nova edición da campaña educativa dos Puntos Violeta no marco da conmemoración do 25 de novembro, Día Internacional para a Eliminación da Violencia contra as Mulleres. Esta intervención combinou espazos de información e sensibilización instalados nos recreos con obradoiros participativos en aula dirixidos ao alumnado de 3º de primaria.
Os Puntos Violeta funcionan como espazos de información, sensibilización e orientación para a prevención, detección e actuación fronte ás violencias machistas. Son atendidos por un equipo profesional especializado en igualdade, diversidade e violencias, que achega ao alumnado e profesorado contidos adaptados á etapa educativa, recursos específicos e claves para comprender e identificar situacións de risco, sempre desde unha perspectiva pedagóxica que promove o trato igualitario, o respecto e os coidados.
Entre o 13 e o 26 de novembro, o alumnado e o profesorado dos CEIP Luís Seoane, Isidro Parga Pondal, Rabadeira e Ramón María del Valle-Inclán participaron activamente tanto nos obradoiros como nos Puntos Violeta instalados nos centros. A acollida foi moi positiva, destacando o interese do alumnado e a súa participación activa.
Os obradoiros permitiron abrir espazos seguros de reflexión adaptados á idade, nos que o alumnado puido expresar dúbidas, inquietudes e ideas propias sobre como promover relacións máis respectuosas, e abordando a detección das violencias sexuais na infancia.
Co desenvolvemento desta campaña, o Concello de Oleiros reforza o seu compromiso coa promoción dunha comunidade educativa libre de violencias, insistindo na educación en igualdade e prevención e detección temperá de base como ferramentas imprescindibles para avanzar cara a un municipio máis xusto e igualitario.
