Oleiros, 6 de febreiro de 2020-. Aquelas persoas que teñan nas súas propiedades algunha palmeira infectada co picudo vermello están obrigadas a eliminalas a través dunha empresa especializada, tal e como estipula a Consellería de Medio Ambiente. Para evitar a desaparición da totalidade das palmeiras do municipio, tal e como aconteceu en moitas localidades da provincia de Pontevedra, é imprescindible unha actuación inmediata ante esta praga.
Esta semana o Concello detectou 6 palmeiras infectadas polo picudo en Mera. As persoas propietarias das árbores van recibir de maneira inmediata un requirimento co protocolo de eliminación que deben realizar.
O picudo vermello é un voraz insecto de orixe asiática que se instala nas palmeiras para reproducirse. Unha vez dentro das árbores devora as follas e a súa parte central ata provocar a súa morte.