Oleiros, 13 de febreiro de 2013-. O próximo venres día 15 a partir das 19:00 horas no pavillón Arsenio Iglesias de Santa Cruz terá lugar a Festa do Entroido do Concello de Oleiros. A festa, que incluirá a actuación musical da Orquestra Os Satélites, conta cun concurso de disfraces con grandes premios, tanto para grupos como individuais, así como unha chocolatada para todas as persoas que asistan.
No concurso poderán participar todas as persoas maiores de 16 anos que o desexen. O xurado valorará a creatividade, posta en escena, orixinalidade, calidade na confección e as características dos materiais utilizados, ademais valoraranse aqueles disfraces onde o conxunto de todos estes elementos sexa representativo do espírito festeiro do Entroido.
Os premios previstos para esta edición son os seguintes:
Individual Grupo
1º premio de 300 € 1º premio de 1.000 €
2º premio de 200 € 2º premio de 700 €
Dous 3º premios de 100 € cada un Dous 3º premios de 400 € cada un
As persoas interesadas poderán inscribirse previamente antes das 12:00 h do xoves 14 de febreiro de 2013 por calquera das seguintes maneiras:
•Por correo electrónico, enviando ao enderezo de correo electrónico e.rodríguez@oleiros.org a inscrición que poderán descargar na páxina web www.oleiros.org.
•A través do teléfono de atención ao veciño 981 610 000.
•Acudindo ás oficinas de Servizos Sociais na rúa Camilo Díaz Baliño de Oleiros.
•O día da celebración do concurso, o venres 15 de febreiro, na polideportiva Arsenio Iglesias de Sta. Cruz entre as 19:00 e as 19:30 horas.