A súa figura queda desde esta tarde inmortalizada nunha escultura de aceiro cortén. Esa obra de arte é un dos múltiples encantos deste parque que conta con anacos de vellas edificacións e valados de pedra, no que se instalou unha zona de sombra para xogos de mesa, varios conxuntos de estar, recunchos para o recollemento e un tratamento da xardinería moi cercano aos conceptos silvestres, con refuxios para morcegos, hoteis de insectos, un pequeno estanque e múltiples plantacións de especies das que se encargaron alumnas e alumnos dos centros educativos do Concello.
Precisamente a educación foi unha das chaves que aportou o alcalde, Ángel García Seoane, no seu discurso inaugural, que foi en si mesmo unha homenaxe a Rosalía Mera e á súa filla Sandra Ortega, “unha familia —dixo García Seoane— que pese a ser das máis ricas do país nunca fixo ostentación e sempre viviu aquí coa súa familia, enviando aos seus fillos ás escolas públicas de Oleiros”. O alcalde tamén agradeceu, unha vez máis, a doazón do parque a Sandra Ortega e o mimo con que traballaron non só o departamento de parques e xardíns do Concello, senón Trébore, a construtora Esmorís, o Grupo Naturalista Hábitat, o alumnado dos colexios públicos de Oleiros ou a muralista Lidia Cao.
