Oleiros, 6 de outubro de 2014-. O Goberno municipal esixe á Xunta que solucione de inmediato os episodios de olores pestilentes que se están a suceder ao longo destes días nunha importante zona da parroquia de Nós. Trátase dun problema que sofren desde hai moitos anos os veciños das zonas da Gándara, San Marcos e Bartolomé de las Casas. Estes olores orixínanse na zona do polígono industrial do Espírito Santo, en Cambre. Así mesmo, o Concello solicita á Xunta que se identifique aos responsables dos vertidos que xeran estes olores e que as sancións para estes delincuentes medio ambientais sexan exemplares.
O Concello de Oleiros xa esixiu á Xunta de Galicia en numerosas ocasións que solucionase este grave problema de contaminación ambiental porque afecta directamente á calidade de vida de moitos veciños, xa que os olores chegan a ser insoportables. A pesar de que o Goberno autonómico asegurou que este problema estaba solucionado, a situación continúa igual nesta zona da parroquia de Nós e nos pasados días volveron os olores con máis intensidade se cabe que anteriores ocasións.