Oleiros, 28 de xuño de 2017-. Para afrontar da mellor maneira posible o incremento de persoas que se produce no verán no municipio e continuar ofrecendo uns servizos de calidade a todos os veciños e veciñas, o Concello de Oleiros contratou un total de 70 persoas: 41 persoas para o Servizo de Salvamento e Socorrismo, 4 auxiliares de policía, 3 técnicos de turismo, 9 persoas para o servizo de limpeza de praias, 5 para a brigada de limpeza forestal, 5 operarios para a limpeza viaria e outras 3 persoas para diversos departamentos do Concello.
Unha parte desas contratacións prodúcense grazas aos acordos asinados tanto coa Deputación, para a contratación dos operarios para a limpeza das praias, como coa Xunta de Galicia, que permite que 5 persoas perceptoras da RISGA poidan ter un traballo realizando tarefas de limpeza viaria no municipio durante 7 meses e tres socorristas se incorporen ao Servizo de Salvamento das praias.
Unha grande parte de todos os gastos extraordinarios derivados do verán, que superan os 300.000 euros, pódense afrontar cos recursos procedentes da ORA, que ademais fomenta a rotación de vehículos e impide que os mellores estacionamentos estean ocupados todo o día polos mesmos coches.