Oleiros, 4 de setembro de 2019-. A próxima semana retómanse as actividades do programa municipal de apoio a persoas coidadoras ”Descubrindo emocións”. O obxectivo é apoiar á persoa coidadora co fin de mellorar a súa calidade de vida, reducir a aparición de trastornos psicolóxicos e conseguir a mellor adaptación posible á situación que está a vivir a diario no seu rol de coidadora, dotándolle de estratexias para manexar dunha forma axeitada as situacións de estrés coas que se enfronta.
“Coidar ao que coida”, con esta frase resúmese a importancia fundamental que ten o apoio á persoa que asume a responsabilidade na atención ás persoas enfermas ou dependentes, xa que ademais do apoio directo que se presta a través doutros programas como axuda no fogar, centros de día, comida sobre rodas, teleasistencia..., o benestar da persoa coidadora é a mellor forma de contribuír ao benestar das persoas dependentes.
ACTIVIDADES:
- Coidando emocións: mércores de 16:30 a 18:30 horas
- Descubrindo emocións: luns de 16:30 a 18:00 horas
- EstimulAcción: mércores e venres de 10:00 a 12:00 horas
- Paseo dos sentidos: luns 11 setembro
- X Encontro de persoas coidadoras. A liberdade de coidar: venres 13 de setembro, ás 11:00 horas, no Teatro das Torres e no Castelo de Santa Cruz.
As persoas coidadoras que desexen participar nestas actividades deben dirixirse ao Departamento de Servizos Sociais e Igualdade de Oleiros ou ao teléfono 981 610 000.