Nesta ocasión o obxectivo é ir un paso mais aló, proporcionar unha primeira atención de forma individualizada ás persoas veciñas de Oleiros afectadas polo parkinson. Isto é posible grazas ao apoio que tivo a Asociación Parkinson Galicia-A Coruña dende a Fundación “La Caixa” e á estreita colaboración cos Servizos Sociais de Oleiros.
A partir do vindeiro 15 de maio a Asociación Parkinson Galicia-A Coruña atenderá, baixo cita previa, a aquelas persoas veciñas de Oleiros afectadas por esta enfermidade e que desexen recibir información sobre a enfermidade e sobre os servizos e apoios que pode atopar na asociación.
A atención será os venres, cunha periodicidade quincenal, nas oficinas de Servizos Sociais en Perillo, no edificio de Villa Echeverry,
As persoas interesadas poden contactar directamente coa Asociación de Parkinson e pedir cita nos seguintes teléfonos: 981 241 100 ou no 618 950 128 ou ben a través do enderezo electrónico info@parkinsogaliciacoruna.org.
A coordinación entre a Asociación de Parkinson e os Servizos Sociais do Concello de Oleiros vai garantir, tanto a reserva de espazo para esa primeira atención, como unha intervención conxunta no suposto de ser necesaria.
Para un maior coñecemento deste recurso, o pasado 27 de abril tivo lugar, no propio edificio de Villa Echeverry, unha reunión informativa na que a Asociación Parkinson Galicia-A Coruña trasladou a 25 profesionais do ámbito do social e do sanitario a posta en marcha deste proxecto, informando das posibilidades de apoio desde a asociación ás persoas afectadas e ás súas familias.
A esta xuntanza acudiu persoal do equipo dos Servizos Sociais Comunitarios de Oleiros, dos centros de saúde de Perillo, Oleiros e Santa Cruz, da residencia pública de maiores de Oleiros, das residencias de maiores privadas con presenza no termo municipal e parte do equipo que presta o Servizo de Axuda no Fogar no Concello de Oleiros.
Un paso máis para intentar seguir facendo máis accesible a información e a atención as persoas veciñas de Oleiros.
Calquera dúbida ou consulta poden dirixirse aos Servizos Sociais Comunitarios de Oleiros no teléfono de atención ao veciño 981 610 000 ou ben a través do enderezo electrónico s.sociais@oleiros.org.