Oleiros, 25 de febreiro de 2011-. A Unidade Administradora do Fondo Social Europeo do Ministerio de Traballo remitiu un escrito ao Concello de Oleiros no que sinala que está investigando as reiteradas denuncias do Goberno local en relación á repartición da Xunta de Galicia dos fondos estatais e europeos para combater o desemprego. O goberno local de Oleiros remitiu unha serie de documentación sobre este asunto ata en tres ocasións. O 14 de xuño e o 4 de novembro de 2010 e o pasado 31 de xaneiro de 2011.
Na notificación, recibida o pasado día 22 deste mes na Casa do Concello o Ministerio sinala que os escritos foron remitidos ao Servizo Público de Emprego Estatal, ao que se lle solicitou información respecto diso, sen que ata o momento esta unidade reciba contestación. A Unidade Administradora do Fondo Social Europeo indica na carta remitida ao alcalde, Ángel García Seoane, que tan pronto como esta unidade teña resposta por parte do Servizo Público de Emprego Estatal, poráselle no seu coñecemento, e comunicaránselle as medidas adoptadas para o efecto.