Oleiros, 8 de xullo de 2013-. O alcalde de Oleiros, Ángel García Seoane, recordou esta mañá a importancia do tramo en funcionamento da vía Ártabra entre as localidades de Arillo e Veigue. O rexedor destacou que este itinerario é o máis rápido e cómodo para acceder ás praias da zona norte dos municipios de Oleiros e Sada. Ademais a ruta permite evitar os atascos que se crean nas zonas de acceso á localidade de Mera. «Desde Arillo a Mera tárdase minuto e medio en vez dos máis de 20 que se pode tardar en entrar en Mera desde a estrada xeral», sinalou.
Así mesmo o alcalde apuntou que o acceso ás praias de Mera e Espiñeiro desde a vía desdobrada e a través da estrada da Besta permite estacionar comodamente e de forma gratuíta a 5 minutos camiñando destes areais. O pasado verán o Concello habilitou unha ampla zona de aparcamento con máis de 10.000 metros de superficie nas inmediacións da urbanización Pía de Maianca.