Oleiros, 13 de maio de 2015-. Mañá comezan as rutas de sendeirismo para persoas maiores de 60 anos do Concello de Oleiros. O grupo de Dorneda, Santa Cruz e os Regos vai realizar a primeira das rutas previstas polo municipio, paso a paso, un percorrido de entrenamento polo Concello de Oleiros no que se realiza unha valoración das capacidades e posibilidades das persoas inscritas para realizar o resto das rutas previstas no programa.
Este ano o percorrido desta primeira ruta transcorre por cinco parroquias, sae de Santa María de Oleiros, capital do Concello, e posteriormente vai polas parroquias de Dorneda, Maianca, Serantes, Dexo e Lorbé. Un total de 14 km no que se percorrerán zonas rurais ata chegar ao porto do Lorbé.
O Pazo de Miraflores e o Pazo de Xaz serán dous dos edificios que se coñecerán neste camiño, descubriranse historias e lendas así como a fauna e a flora que atopamos ao paso. Finalmente, ao chegar ao porto de Lorbé, se coñecerán de primeira man as explicacións sobre o funcionamento das explotacións acuícolas que hai na zona.
O día 21 de maio realizarán a ruta as persoas das parroquias de Nós, Oleiros, Iñás e Montrove e o día 28 as de Dexo, Lorbé, Serantes, Maianca e Perillo. No resto das rutas de sendeirismo previstas para os próximos meses no Programa Ven e Descubre se visitará a Costa da Morte, a península do Grove e a outra Compostela, así como a zona de Lalín e Carballiño nas rutas de fin de semana do mes de setembro.