Durante a súa intervención, o alcalde Ángel García Seoane lamentou que a Xunta continúe sen recoñecer Alfaroleiros como unha das grandes feiras artesanais de interese turístico galego, malia tratarse dun evento consolidado que durante cinco días reúne en Santa Cruz a oleiros e oleiras de diferentes puntos da Península. O alcalde criticou a falta de apoio do Goberno autonómico, asegurando que “quere ignorar a Oleiros, pero é Oleiros o que ignora ao Goberno galego e segue o seu camiño”, e denunciou tamén a ausencia de financiamento autonómico “nin para esta feira, nin para beirarrúas, nin para estradas, nin para cultura”.
O presidente en funcións da Deputación da Coruña, Xosé Regueira Varela, desexou que esta sexa “a mellor edición de Alfaroleiros da historia” e puxo en valor o simbolismo da olería, sinalando que “o barro nos inspire cara ao futuro e que a nosa resposta ante as crises humanitarias sexa tan nobre e tan paciente como é a do oficio oleiro cunha peza de barro”.
Pola súa banda, a concelleira de Cultura, María José Santos Zas, destacou que "se algo nos identifica aos galegos como pobo é a capacidade de converter o material máis humilde nun produto valioso", e puxo como exemplo a gastronomía e a olería, dúas expresións da identidade galega que, segundo indicou, atopan en Alfaroleiros unha celebración que recoñece e dignifica este patrimonio artesanal.
A feira rematará o domingo 9 de agosto. Ata ese día os 23 oleiros que participan nesta feira expoñerán e venderán as súas pezas en horario de 10 a 22 h. Tamén haberá numerosas actividades culturais e de ocio, dirixidas a todos os públicos. Para hoxe mércores está programado ás 21h o concerto de Abril, no Parque Luís Seoane; e para o xoves un espectáculo de malabares e circo da man de Pistacatro “Sen patrón”, ás 20h, e o concerto de MJ Pérez, ás 21h.