Coñecerse é vivirse foi un obradoiro de autocoñecemento activo arredor da menopausa e a perimenopausa (climaterio) dirixido a mulleres. Foi desenvolto ao longo do mes de abril de 2023 no marco de actuación do II Plan de Igualdade.
Coñecerse é vivirse foi un obradoiro de autocoñecemento activo arredor da menopausa e a perimenopausa (climaterio) dirixido a mulleres. Con el, buscouse favorecer o desenvolvemento de ferramentas e coñecementos, co fin de conseguir un estilo de vida positivo e saudable, reflexionando e introducindo outra mirada sobre as manifestacións da menopausa, o climaterio e a sexualidade. Para isto, aumentáronse os coñecementos das participantes en relación ás súas propias vivencias durante a etapa do climaterio e a menopausa. Ademais, buscouse dar resposta ás súas inquietudes, así como reflexionar sobre as vivencias persoais e sociais arredor deste fenómeno, ofrecendo información que sirva como base para a toma de decisións desde a autonomía e o coñecemento.
Esta actividade estivo desenvolta no marco de actuación do II Plan de Igualdade, tendo como finalidade crear un espazo seguro e amable, no que coñecerse e nutrirse para poder vivir de forma máis sa, satisfactoria e desde o coñecemento. Deste xeito, traballouse a relación co propio corpo e a saúde durante as etapas vitais nas que se produce a menopausa e perimenopausa, detectando cales son os cambios fisiolóxicos que se producen, os principais síntomas e trastornos asociados, recollendo ferramentas terapéuticas dirxidas a ter un maior benestar coa sintomatoloxía etc., todo ilo desde un enfoque integral, persoal e social.
Así, con este obradoiro buscouse:
- Posibilitar un espazo de reflexión onde compartir as vivencias propias e persoais.
- Favorecer o desenvolvemento de ferramentas para conseguir un estilo de vida positivo e saudable desde o coñecemento e a autonomía.
- Coñecer os aspectos relacionados con esta etapa vital, e aqueles factores que inflúen nos cambios.
- Traballar a conceptualización da menopausa e o climaterio.
- Identificar os estereotipos, os temores e os mitos asociados á menopausa e a súa interiorización social.
- Analizar os cambios producidos no propio corpo e aprender a valoralo, a coidalo, a querelo e a aprecialo, establecendo con el unha relación positiva desde a autoestima e a asertividade.
- Coñecer os recursos comunitarios dispoñibles acorde coa súa etapa vital.
Durante as sesións, traballáronse os seguintes contidos:
- Que sabemos e que non sabemos da menopausa e o climaterio.
- Fisioloxía da menopausa.
- Outra mirada sobre as manifestacións da menopausa.
- Resignificación integral da menopausa dende o autocoñecemento, a autonomía e o bo trato.
- Desmontando falsas crenzas sobre a sexualidade na menopausa.
- Como vivir unha sexualidade gozosa e saudable durante e despois da menopausa.
Foi un obradoiro vivencial e, como tal, traballouse cunha metodoloxía activa, baseada no intercambio de ideas e no traballo persoal, creando un ambiente acolledor e agradable, no que resultase doado falar das propias emocións, preocupacións e dúbidas.
Ao final desta publicación, recóllense algunhas imaxes das diferentes sesións do obradoiro.
