Oleiros, 3 de setembro de 2018-. A partir da próxima semana reinícianse as distintas actividades que desenvolve o Concello de Oleiros no marco do Plan de Igualdade. Inicialmente son tres as actividades que contan con algunha praza vacante para as que xa está aberto o prazo de inscrición.
O luns 10 de setembro, no centro cultural A Fábrica, empeza Movemente. Trátase dun taller de fortalecemento da conexión do corpo e da mente no que se combina o movemento con distintas expresións artísticas.
O Obradoiro do corpo comeza o mércores 12 de setembro na Casa da cultura de Perillo. É unha actividade corporal que persigue obxectivos de benestar integral, revalorizando a identidade de cada muller participante, así como fomentar hábitos de vida saudables e favorecer unha maior vida social.
Luces, cámaras... acción! retómase o venres 14 de setembro no centro cultural A Fábrica. Este obradoiro, dirixido tanto a mulleres como a homes, explora as emocións a través da interpretación e da creación dun audiovisual.
Todas estas actividades están aliñadas coa procura permanente que temos como persoas do noso benestar, dun maior autocoñecemento e do reforzo da autoestima e das nosas capacidades. Para iso combínanse modernas metodoloxías que van dende a actividade física e o movemento do corpo á comunicación a través da palabra e de distintas expresións artísticas.
As persoas interesadas en participar nalgún destes obradoiros poden informarse e coller as follas de inscrición no departamento de Servizos Sociais de Oleiros, a través do Facebook dos Servizos Sociais Oleiros, na web municipal ou ben a través do teléfono de atención ao veciño 981 610 000.