As viaxes de Paio e Aurelio é o novo espectáculo de Oviravai, un grupo de música infantil no que a través das vivencias de Paio e Aurelio tratarase a primeira viaxe dun teixugo molón e un oso polar que visitarán o Polo Norte. No espectáculo trátase a diversidade, as linguas, as culturas, a amizade, a boa alimentación...
A trama conta como Paio coñece o oso Aurelio viaxando por Europa, como nace a súa amizade e como se axudan nos momentos difíciles. Todo isto dentro dun contexto de respecto absoluto aos valores fundamentais como o respecto pola natureza, a importancia da reciclaxe, a amizade, o esforzo e o amor cara á nosa lingua.
O concerto está destinado a familias con nenos e nenas de 0 a 10 anos. Terá lugar na Fábrica este sábado 4 de maio, ás 18.30 horas. A entrada é gratuíta con reserva previa no correo lingua@oleiros.org (indicando o nome do/a neno/a, idade, nome das persoas acompañantes, teléfono, correo electrónico e número de entradas) e haberá que recibir a confirmación da reserva de entradas.