Oleiros, 26 de septiembre de 2019-. A compañía Escoitade Teatro presenta o sábado ás 20:30 horas no Auditorio Gabriel García Márquez de Mera o seu espectáculo Un hotel de primeira sobre o río. María José Iglesias, Isidro Piñeiro, Doro Piñeiro, Eugenia García, Yaiza Fernández, Pastora Comesaña, Rosario Alonso, Raúl Alonso, e Raquel Álvarez forman o elenco desta obra de Xohana Torres, que dirixe Doro Piñeiro.
O texto de Xohana Torres está adaptado en catro cadros por Doro Piñeiro para Teatro Escoitade. Nel son constantes as referencias ás múltiples relacións persoais que nos atopamos acotío ao longo da vida, como tamén o son as luces e sombras que debuxa a condición humana e que en moitas ocasións, tal condición, remata por saírse do que se considera a estabilidade emocional da persoa, do individuo. Tal así é a defensa "do noso, dos nosos e do máis próximo", a presión especulativa, a corrupción política, o desinterese social e a superstición que levamos no ADN, como xeito de saída a toda unha carencia cultural de sociedades xa caducas, e non tanto. Un hotel de primeira sobre o río é un relato, é unha historia de amor á natureza, é unha loa á impotencia e, finalmente, é un xeito de vida con data de caducidade.
Entrada libre con invitación. As invitacións poderán recollerse a partir das 19.30 horas, ata completar a capacidade da sala. A obra está recomendada para maiores de 12 anos.