Oleiros, 7 de decembro de 2018-. O vindeiro martes día 11 de decembro ábrese o prazo de preinscrición para participar nunha nova edición de Ocioleiros. Mantéñense a maioría de actividades e incorpóranse outras novas. En total ofértanse 27.
Ocioleiros está dirixido exclusivamente aos veciños e veciñas empadroados en Oleiros, maiores de 18 anos. A finalidade deste programa é fundamentalmente lúdico, dirixido á diversión e ao entretemento.
As persoas interesadas en participar poderán inscribirse a través da web municipal. O prazo abre o martes próximo e finalizará o 20 de decembro. As listaxes con todas as persoas preinscritas colgaranse o 26 de decembro para a emenda de erros. Se hai máis demanda que prazas ofertadas nunha actividade, intentarase habilitar novos grupos. De non ser posible, as prazas adxudicaranse por sorteo. O día do sorteo será o 9 de xaneiro ás 12.00 horas na Fábrica e as listaxes de admitidos e admitidas estarán expostas a partir do 14 de xaneiro. Unha vez publicadas esas listaxes, o prazo de pagamento irá do 28 de xaneiro ao 1 de febreiro. Os días 6 e 7 de febreiro estará aberto o prazo para cubrir vacantes, sempre que estean en lista de agarda nas actividades solicitadas.