Oleiros, 21 de marzo de 2023-. O mércores 29 de marzo abre o prazo para solicitar inscrición para os obradoiros trimestrais de grafiti infantil e xuvenil organizados polo departamento de Cultura dentro da Escola municipal de Obradoiros artísticos, e que terán lugar de abril a xuño na Escola infantil O Castaño de Perillo. A idea destes obradoiros é dar a coñecer ao alumnado a arte urbana.
Trátase dun taller cheo de cor, para aprender as diferentes técnicas do grafiti: o stensil, spray, ferramentas básicas para levar a cabo estas obras, e onde desenvolver as habilidades en canto ao trazo, o recheo e o difuminado.
O obradoiro infantil será os venres de 16.30 a 18.00 horas e está destinado a nenos/as nacidos/as entre o ano 2011 e 2016 e o obradoiro xuvenil será os venres de 18.00 a 19.30 horas e está destinado a xóvenes nacidos/as entre o ano 2005 e 2010. Ambos teñen un prezo de 23 euros/mes.
As preinscricións realizaranse preferentemente na Sede electrónica a partir do mércores 29 de marzo ás 10.00 horas. No caso de que algunha persoa non lle sexa posible realizala así, poderá facelo na Fábrica en horario de mañá de 10.00 a 14.00 horas. As prazas ocuparanse por orde de solicitude.