Oleiros, 03 de decembro de 2015-. Profesorado e alumnado do IES Xosé Neira Vilas realizará mañá un acto de homenaxe ao escritor que lle dá nome ao centro polo seu recente pasamento. Haberá múltiples actividades para lembrar a un gran amigo do Concello de Oleiros e un ilustre da literatura galega.
Os actos comezarán en todas as aulas de xeito simultáneo ás 11:20 horas. Visualizarase “In memoriam” desde a web do IESP e o vídeo onde Neira Vilas explica como comezou a escribir. Ademais, escoitarán o poema “Ai amor” musicado por A Quenlla e lerán unha escolma de textos seleccionados por parte do alumnado.
Ás 11:45 horas sairán todos e todas das aulas para dirixirse ao patio, cada grupo co seu profesor correspondente. Haberá diferentes intervencións de todos os membros da comunidade educativa que lerán diferentes textos do escritor. A homenaxe rematará coa actuación musical “Ai amor” das nenas de 1º da ESO.