Tal e como din as mensaxes que se poden ler no autobús, o servizo “non arranca” porque a Xunta de Galicia leva dous anos rexeitando as continuas peticións realizadas por parte do Concello de Oleiros. Unha situación que ademais é discriminatoria con Oleiros, e tamén con Sada, parte de Cambre, Bergondo, Betanzos,... que ven como en Arteixo e Culleredo si dispoñen de conexión directa aos campus.
O Concello de Oleiros demanda a creación dunha liña entre Perillo e o campus universitario da Coruña que funcione de forma circular nas franxas horarias de entrada e saída das aulas. Dado o volume de persoas que se beneficiarían desta conexión non se entende o postura da Xunta ante esta proposta.
A esperpéntica falta de conexión coa Universidade é unha mostra máis do miserento servizo de transporte público que a Xunta de Galicia presta na comarca da Coruña e que se nega a mellorar, ignorando os problemas que sofren a diario milleiros de cidadáns para desprazarse; adoptando continuamente unha posición de defensa da empresa concesionaria e do lucro das liñas, cando un servizo público coma este non se pode medir exclusivamente en termos de rendibilidade económica.
Os feitos demostran que a Xunta non quere resolver o grave problema de mobilidade existente na comarca da Coruña, polo que a creación dun Consorcio Metropolitana de Transporte que leva propoñendo anos o Concello de Oleiros sería determinante, así como abordar importantes obras pendentes na rede viaria: Alfonso Molina, ponte Pasaxe, Vía Ártabra, Artabriña, Vial 18...