Oleiros, 25 de maio de 2020-. Tal e como determinou o Goberno central, desde hoxe pódese tomar o sol, bañarse e permanecer nas praias, sempre que se respecten as medidas de seguridade e hixiene establecidas para a prevención do Covid-19 polas autoridades sanitarias. Como norma xeral establécese o mantemento dunha distancia mínima de seguridade de polo menos dous metros, ou no seu defecto, medidas alternativas de protección física ou etiqueta respiratoria (uso de máscaras).
A colocación dos obxectos persoais, toallas, cadeiras e elementos similares farase de xeito que se garanta un perímetro de seguridade de dous metros con respecto aos demais usuarios, agás no caso de bañistas que convivan ou de grupos que en ningún caso poderían superar o número máximo de persoas que se poden concentrar a día de hoxe, quince. No caso de formarse un grupo, o número máximo de membros é de 15 persoas.
Está permitida a práctica de actividades deportivas, profesionais e de recreo, sempre que se poidan desenvolver individualmente e sen contacto físico, mantendo a distancia mínima de dous metros entre os participantes.
Inicialmente, seguindo as indicacións do Goberno central e da Xunta de Galicia, as duchas permanecerán pechadas. Tampouco estará permitido o acceso aos areais dos cans e as praias serán declaradas libres de tabaco.
O Concello de Oleiros fai un chamamento ao respecto das normas por parte de todos os cidadáns. A responsabilidade individual é imprescindible para que exista seguridade nas praias. Os bañistas deberán acatar en todo momento as normas establecidas polo Goberno central e realizar un uso responsable da praia e das súas instalacións, tanto desde o punto de vista medioambiental coma sanitario.