Oleiros, 25 de abril de 2017-. O Concello de Oleiros, a través do Centro Municipal de Formación Isaac Díaz Pardo, axudou a 312 persoas a atopar emprego durante o ano 2016. En total foron atendidas 4.435 persoas nas dependencias dos Regos ao longo do ano pasado.
Das 312 persoas que conseguiron ser contratadas, 88 introducíronse no mercado laboral a través dos programas de emprego municipal, 178 aproveitaron as ofertas de emprego tramitadas e 46 crearon o seu propio posto de traballo como emprendedores. A partir do asesoramento proporcionado no Centro Municipal de Formación a 121 proxectos empresariais, tamén naceron un total de 30 novas empresas que orixinaron 46 novos empregos.
Por outro lado, o Concello de Oleiros ten aberta agora mesmo unha convocatoria para a contratación de 9 operarios para a limpeza das praias. O prazo de presentación de solicitudes remata o vindeiro día 4 de maio. Así mesmo, onte finalizou a presentación de candidaturas para traballar no Servizo de Salvamento e Socorrismo do Concello de Oleiros durante a tempada de praias. Hai máis de 70 aspirantes para 38 prazas.