Oleiros, 25 de outubro de 2019-. O Castelo de Santa Cruz iluminarase a noite do sábado de cor verde polo Día do Dano Cerebral como apoio ás reivindicacións do movemento asociativo agrupado arredor desta doenza. O Concello de Oleiros atendeu a petición de ADACECO, a Asociación de Dano Cerebral da Coruña, co obxectivo de sensibilizar a sociedade sobre as necesidades que teñen as persoas cun problema deste tipo como consecuencia dun ictus, un accidente, un tumor...
Son 4.500 persoas as que están afectadas en toda a provincia da Coruña por este problema e esta asociación, a través do centro de día que ten na Coruña, intenta cubrir as necesidades deste colectivo principalmente no que a rehabilitación se refire a través de servizos de terapia ocupacional, logopedia, fisioterapia, así como actividades de ocio e tempo libre.
As reivindicacións do asociacionismo de dano cerebral concrétanse no establecemento dun criterio diagnóstico de dano cerebral adquirido (DCA) no momento da alta hospitalaria, a elaboración dun censo de persoas con dano cerebral, a posta en marcha dunha estratexia integral de atención ao DCA e de medidas especiais de apoio a estas persoas e ás súas familias, en especial daquelas en situación de especial vulnerabilidade.
Con este xesto, o Concello de Oleiros súmase aos actos convocados para este día. Son moitas as persoas que precisan dunha atención rehabilitadora máis aló da que se está a prestar na actualidade desde a sanidade pública.