Oleiros, 16 de setembro de 2020-. Este xoves están convocadas mobilizacións en todo o Estado, baixo o lema Alerta vermella, para denunciar a situación de desamparo na que se atopan os diferentes profesionais da cultura. O Concello de Oleiros, ademais de continuar promovendo a realización de espectáculos no municipio, vai participar nesta xornada reivindicativa iluminando de vermello o Castelo de Santa Cruz.
Desde o levantamento do Estado de alarma, e sempre cumprindo coas directrices sanitarias, o Concello organizou numerosas actividades e espectáculos tales como o Festival Rúa Ext-cénica, a Feira Alfaroleiros, Música na Rúa, actividades nas bibliotecas, teatro, etc... Ademais, para os vindeiros meses está programada unha ampla oferta de actividades e eventos culturais.