Oleiros, 13 de novembro de 2020-. O Servizo de Normalización Lingüística do Concello de Oleiros convoca o VII Premio Literario Descubrindo Oleiros, unha proposta que busca promover o uso da lingua galega e dar a coñecer o municipio. Este premio está orientado a todos os rapaces e rapazas de 3º, 4º, 5º e 6º de primaria e de ESO empadroados/as no Concello de Oleiros, establecéndose catro categorías, unha por cada ciclo.
Os relatos estarán ambientados en Oleiros, escritos en lingua galega e poderán presentarse ata o 22 de decembro. Os espazos do municipio poden aparecer en fotografías, imaxes, debuxos ou simplemente aparecer citados. Os premios que se concederán serán produtos electrónicos que fomenten a creatividade.