Oleiros, 12 de decembro de 2015-. Desde hoxe está aberto o prazo de preinscrición para participar nunha nova edición de Ocioleiros. Mantense a maioría da programación con varias novidades, en base ás suxestións das persoas participantes da edición anterior. En total, ofértanse 35 actividades.
Ocioleiros está dirixido exclusivamente aos veciños e veciñas empadroados en Oleiros. A finalidade deste programa é fundamentalmente lúdico, dirixido á diversión e ao entretemento. Existen dous grupos de actividades, unhas dirixidas aos máis novos, mozos e mozas de entre 14 e 17 anos, e outras destinadas ás persoas maiores de idade.
As persoas interesadas en participar poderán inscribirse a través da web municipal. O prazo para apuntarse finalizará o 21 de decembro. As listaxes con todas as persoas preinscritas colgaranse o 23 de decembro para a emenda de erros. Se hai máis demanda que prazas ofertadas nunha actividade, intentarase habilitar novos grupos. De non ser posible, as prazas adxudicaranse por sorteo. O día do sorteo será o 9 de xaneiro ás 12.00 horas na Fábrica e as listaxes de admitidos e admitidas estarán expostas a partir do 12 de xaneiro. Unha vez publicadas esas listaxes, o prazo de pagamento irá do 23 ao 27 de xaneiro.