Oleiros, 30 de abril de 2020-. O Concello de Oleiros conta con máis dun millón de metros cadrados de parques, praias, paseos e bosques públicos, que estarán a disposición de todos os veciños e veciñas do municipio para pasear e facer deporte individualmente nos horarios establecidos polo Goberno central. A partir do sábado, todos estes espazos estarán abertos, incluído as praias nas que poderá practicarse surf.
As persoas maiores de 14 anos poderán saír entre 6:00 e as 10:00 e entre as 20:00 e as 23:00 horas. Os nenos e nenas poderán saír de 12:00 a 19:00 horas, sempre en compañía dunha persoa maior de idade responsable. As persoas maiores de 70 anos ou aquelas que teñan que saír cunha persoa coidadora poderán facelo de 10:00 a 12:00 e de 19:00 a 20:00 horas.
O decreto do Goberno impide o desprazamento en vehículo privado para practicar deporte. Si é posible desprazarse camiñando, sen saír do municipio nos horarios previstos. Ningunha administración pública pode actuar á marxe das directrices publicadas no BOE.
O Concello de Oleiros fai un chamamento á responsabilidade de todos os cidadáns. É imprescindible o respecto das normas e manter unha distancia mínima de seguridade de dous metros para evitar posibles contaxios.