Oleiros, 16 de decembro de 2015-. O próximo luns, 19 de decembro, ás 19:00 horas, terá lugar no Auditorio da Fábrica en Santa Cristina un espectáculo de Danza Espello. O grupo que participou neste obradoiro de Danza Espello ofrece este espectáculo coa disposición de abrirnos os seus corazóns e contarnos a súa experiencia a través deste acto público, aberto a todas as persoas interesadas.
Esta actividade é unha máis das numerosas que oferta o Concello de Oleiros a través do desenvolvemento do Plan de Igualdade municipal co obxectivo de reforzar e mellorar o benestar emocional das mulleres do noso concello. A través da consciencia corporal e do movemento espontáneo e natural conséguese descargar, buscar apoios e estímulos sensoriais capaces de permitir ver a realidade baixo un enfoque máis rico, motivador e creativo.
Este acto pon fin a un obradoiro desenvolvido durante todo o ano 2016 desde o Plan de Igualdade do Concello de Oleiros. En todos estes meses un grupo de máis de 15 mulleres traballaron co obxectivo de acadar un maior benestar emocional a través desta novidosa intervención terapéutica, na que a danza, a música e a expresión corporal son ferramentas fundamentais para chegar a ese fin.