Bibliotecas
Campaña de animación á lectura

Campaña de animación da lectura

A Campaña de promoción da lectura realízase co fin de que o alumnado dos centros de ensino público deste Concello adquiran gusto pola lectura e amor polos libros, así como que coñezan algunhas das bibliotecas municipais para que as visiten e utilicen no horario en que non permanecen nos respectivos centros de ensino.

OBXECTIVOS:

- Coñecer algunhas das bibliotecas do Concello de Oleiros.

- Potenciar a asistencia ás bibiotecas municipais, non só como lugar de estudo e consulta, senón tamén como centros de lectura lúdica.

- Espertar o gusto pola lectura, de forma que vexan os libros como algo ameno, cos que poden pasar bos momentos ao mesmo tempo que se instrúen e amplían os seus coñecementos.

- Achegarnos pola vía da animación aos sectores menos dados á lectura, a aqueles nenos/as, adolescentes e mozos/as, que non sinten ningún interese por esta.

- Favorecer procesos de creación e expresión oral e escrita.

- Fomentar unha lectura lúdica, crítica e reflexiva que os faga pensar e reflexionar como cidadáns/as máis libres e solidadarios/as.

- Vivir o libro en colectividade, enriquecéndose cunha lectura activa e participativa.

- Promover a reflexión nos diferentes axentes educativos sobre a importancia da lectura como enriquecimento individual e colectivo.

- Incidir na importancia dos libros de contos, narracións e historietas no desenvolvemento da imaxinación e creatividade dos/das nenos/as, adolescentes e mozos/as.

LUGARES DE REALIZACIÓN:

- Biblioteca Central Rialeda, en Perillo.

- Biblioteca Pública Municipal e Centro de Documentación da Muller "Rosalía de Castro", en Santa Cruz.

- Biblioteca Pública Municipal "Manuel María", en Oleiros.

DESTINATARIAS/OS:

Alumnado dos centros de ensino público de Oleiros.

ACTIVIDADES:

En función das necesidades e da programación de cada centro realizaranse actividades específicas para os distintos centros que as soliciten:

- Presentación da biblioteca e explicación do seu funcionamento.

- Contacontos.

- Narración ou dramatización de contos.

- Actividades literarias.

- Encontros con autores/as.

- Obradoiros de ilustración.

Asset Publisher

Back Día da Muller 2020 en Bibloleiros

Imagen Día da Muller 2020 en Bibloleiros

 

http://bibliotecasoleiros.blogspot.com/2020/03/bibloleiros-en-violeta.html
Con todas estas actividades, organizadas desde as Bibliotecas Públicas Municipais de Oleiros, deséxase conmemorar o Día da Muller e reivindicar a igualdade da muller co home na sociedade actual.

- Actividades da Hora do conto, dirixidas a nenas e a nenos, que promoven a igualdade entre a muller e o home ou de temática feminista:
Mércores 4 de marzo, para nenas-os a partir de 4 anos, Olga Abad con “A viaxe de Maruxa", na Biblioteca Pública Municipal Rosalía de Castro. Santa Cruz
Xoves 5 de marzo, para nenas-os a partir de 4 anos, Anxo Fariña con “Dulcinea, a nena cabaleira", na Biblioteca Central Rialeda. Perillo.
Venres 6 de marzo, para nenas-os de 1 a 3 anos, Charo Pita con "Eu nena, ti neno” , na Biblioteca Pública Municipal Mª José Trincado. Mera.
Martes 10 de marzo, para nenas-os a partir de 3 anos, Trinke Trinke con "Aprendendo a querer", na Biblioteca Pública Municipal Manuel María. Oleiros.

- Nos Clubs de Lectura de Rialeda vanse ler e comentar libros escritos por mulleres con temas feministas como:
Grupo A: La flor púrpura de Chimamanda Ngozi Adichie (comentarase o 11 de marzo).
Grupo B: Madres e hijas. Relatos recompilados por Laura Freixas (comentarase o 18 de marzo).

- Nas actividades dirixidas ao alumnado dos centros de ensino están programados actos con temática feminista ou pola igualdade da muller e o home, como por exemplo:
A favor da igualdade, a cargo de Caxoto. Na Biblioteca Rialeda, o 5 de marzo, ás 10 h. Dirixida a alumnado de 2º de primaria do Colexio Juana de Vega de Nós.
Contos escollidos de Emilia Pardo Bazán, a cargo de Soledad Felloza. Na Biblioteca Rialeda, o 4 de marzo, ás 9:40 e ás 10: 50 (son dúas sesións). Dirixidas a alumnado de 4º de ESO do IES Miraflores.
Emilia Pardo Bazán foi unha muller que, no século XIX, loitou pola igualdade da muller e o home, reivindicando o dereito das mulleres de acceder a todos os niveles da educación.  
 
- Exposicións bibliográficas sobre a muller en todas as bibliotecas:
Biblioteca Central Rialeda, en Perillo: "Abrimos camiño: 25 novelas protagonizadas por mulleres, reais ou imaxinadas". Exposición dirixida a moz@s e adult@s, nas que a ficción literaria inspírase na vida e profesións de mulleres pioneiras como a pintora Leonora Carrington, a poeta Tahiri Quarratu'l-Ayn, a sobrevivente do Holocausto Liana Millu, a escritora Silvina Ocampo, a física e química Maria Salomea Sklodowska, a pintora e escritora Carmen Mondragón, a aviadora Beryl Markham, etc. para crear marabillosos relatos de mulleres singulares, auténticas mulleres-espello no que mirarse, excelsas mulleres-luz que alumean sendeiros hoxe transitables grazas a elas.

“Abrimos camiño: exposición de libros de científicas e artistas que cambiamos o mundo” dirixida a un público infantil e xuvenil. Con títulos como: “Supermujeres superinventoras: ideas brillantes que transformaron nuestra vida”, “Meiga nova, metade anxo, metade marisco: Pequena biografía de Maruja Mallo”, “Las chicas son guerreras: 26 rebeldes que cambiaron el mundo”, etc.

Biblioteca Pública Municipal Rosalía de Castro, en Santa Cruz e na Biblioteca Pública Municipal Manuel María, en Oleiros: a exposición titulada “Só 15 mulleres Premio Nobel de Literatura”. Con obras de escritoras que recibiron o Premio Nobel, acompañadas dunha ficha de cada unha das autoras. Exporanse libros como por exemplo: Una bendición de Toni Morrison, O que ocorreu despois de que Nora abandonara o seu home ou os piares das sociedades de Elfriede Jelinek, ou La vida de las mujeres de Alice Munro, etc.

Biblioteca Pública Municipal Mª José Ruso, en Dorneda: “Con nome de muller”. Formada por obras procedentes de diversos fondos (ensaio, novela, poesía, cine, cómic…) escritas, debuxadas, dirixidas, por mulleres e que falan sobre mulleres.
Haberá libros de autoras coma Alice Munro, Antía Yáñez, Emma Pedreira, Maria Reimóndez, Chimamanda Adichie, Montse Fajardo, Marta Sanz, Carme Adan, Jenny Nordberg, Diane English, Marjane Satrapi, Penelope Bagieu, Adela Turin, Asa Lind, Kathryn Bigelow, Helena Villar Janeiro, ou Claire Bretécher.

Biblioteca Pública Municipal Mª José Trincado, en Mera: “Escritoras galegas de onte e de hoxe que tes que ler”. Escolma de obras dalgunhas das máis destacadas escritoras galegas de todos os tempos. Iniciamos un apaixonante percorrido que parte de Cantares gallegos de Rosalía de Castro, ata chegar a Senlleiras de Antía Yañez, sen esquecernos de escritoras galegas tan importantes como Concepción Arenal, Francisca Herrera, Emilia Pardo Bazán e Sofía Casanova entre outras.

Biblioteca Pública Municipal Ánxel Fole, en Nós: “Miscelánea sobre a muller”. Mostra na que se aborda a temática desde distintas perspectivas, pero sempre tendo presente o  paulatino  empoderamento da muller na nosa sociedade. Dar visibilidade á muller e  á igualdade de xénero entre mulleres e homes. Avanzamos  moito, pero aínda queda un longo camiño no que temos que participar activamente todas e todos. É unha miscelánea que intenta achegar  o papel da muller de  todo os xeitos posibles. Faranse dúas mostras: unha dirixida  para público infantil e outra para adult@s .

Biblioteca Pública Municipal Xograr Mendiño, en Lorbé: “Esencia de muller: Mulleres esenciais na configuración do noso coñecemento”. Presentaranse obras que falen de científicas, literatas, políticas, etc. e outras escritas por elas.