Concello de Oleiros

Concello de Oleiros

Bibliotecas  
Bibliotecas » Actividades » Actividades de promoción da lectura e culturais » A hora do conto

A hora do conto

Para a nena e neno pequeno a palabra oída exerce unha gran fascinación. O conto ou a poesía incorpórano a unha cultura que lle pertence, fano partícipe dunha creación colectiva e outórganlle signos de identidade. O libro oído, visto, tocado, como lectura compartida con outras nenas e nenos, axudaralle no seu contacto coa letra impresa, motivando unha lectura gozosa.

A través do universo máxico dos contos desenvólvese a imaxinación, a fantasía e a capacidade de fabulación de quen escoita. Trátase de espertar unha sensibilidade que faga descubrir o pracer que pode proporcionar a lectura, que os nenos e nenas vexan que tamén se poden divertir e pasar momentos moi agradables cos libros.

Obxectivos:

  • Que as nenas e nenos se divirtan escoitando contos.
  • Que descubran a diversidade dos libros e o pracer pola lectura.
  • Que as nenas e nenos aos que xa lles gusta ler afiancen e consoliden este hábito.

* Comprender, divertirse e reflexionar son os tres principais puntos en que se basea esta actividade.

Os obradoiros e as actividades infantís programadas son moi diversas. Predominan os contacontos, pero tamén se realizarán obradoiros de creación de fósiles de dinosauros, papiroflexia, espectáculos de música e letras, xogos e funcións de maxia, monicreques nas mans, talleres de ilustración, poemas e contos musicados, etc.

Haberá sesións dirixidas especificamente para nenas e nenos de 1 a 4 anos e outras para diferentes idades desde 3 a 12 anos, en función das características de cada actividade.

Para todas as representacións de contacontos dirixidas a nenas e nenos de 1 a 4 anos e para todos os obradoiros é imprescindible reservar praza na biblioteca en que se desenvolva cada unha das actividades, isto pode facerse chamando por teléfono ou achegándose persoalmente.

Soledad Felloza, Maumarela, Juste Kamishibai papel e teatro, Os Quinquilláns, Crearte Servizos Culturais, Pablo Díaz, OQO, Luís Vallecillo, Xulio Varela, Elefante Elegante, Teatro de Marionetas Trécola, A Illa d@s Nen@s, Chío Couto, Efervesciencia, Vicente Mohedano, Mirai Urruzola, Sonia Ojea, Charo Pita e a Compañía Trinke-Trinke cos “Ratos da biblioteca” narrarán diversos contos, como unha invitación a viaxar a un tempo máxico de fantasía e imaxinación ou realizarán diferentes obradoiros para aprender e divertirse con distintas creacións artísticas ou manuais.

Todos os actos serán ás 18:30 horas.
Os días festivos non haberá actuacións.
Estas actividades de animación á lectura realizaranse de forma lúdica, activa e participativa, fomentando a imaxinación e a creatividade.
 

Biblioteca Central Rialeda: Telef. 981 639 511

Teléfono do Veciño: 981 610 000

“O libro, lugar onde dormen as historias que están esperando ser espertadas polas futuras lectoras e lectores”.

Entidades financiadoras
Goberno de España Comunidade Económica Europea Plan Avanza