Oleiros, 14 de abril de 2016-. O sábado ás 20:30 horas no Auditorio Gabriel García Márquez de Mera, Teatro do Morcego presenta o seu espectáculo Presidente, escrito e dirixido por José Prieto. As entradas poñeranse á venda a un prezo de 3,50 euros a partir das 19:30 horas, ata completar a capacidade da sala.
A obra que se representa o sábado en Mera está ambientada en plena campaña electoral, coas enquisas vaticinando a derrota electoral do seu partido, o presidente do goberno e os seus asesores toman a decisión de que o presidente visite persoalmente nas súas casas os seus posibles votantes para convencelos de que a súa opción é a mellor. Distintas familias recibirán nas súas casas, sen previo aviso, a inesperada visita do presidente. Os espectadores coñecerán o resultado das eleccións ao final desta comedia electoral da manipulación política.
O elenco fórmano Celso Parada, Mercedes Castro, César Goldi, Iolanda Muiños e Federico Pérez. A duración da obra é de 80 minutos.