Oleiros, 8 de maio de 2013-. O Goberno local de Oleiros participará na manifestación en defensa do ensino público convocada para mañá no día da folga xeral do ensino e que comezará ás 19.30 horas na praza da Palloza na cidade da Coruña. Como xa sinalou con anterioridade, o Goberno local oleirense apoiará todas as iniciativas programadas para defender o ensino público e contra a LOMCE que propón o Goberno de España.
O Concello de Oleiros considera que a LOMCE equipara os centros educativos con empresas. Prima a competitividade e a xestión de recursos materiais e financeiros por riba de aspectos pedagóxicos e culturais.
Ademais, esta reforma blinda os concertos para colexios que segregan por sexo e é unha lei elitista que segrega e expulsa de forma temperá o alumnado con dificultades de aprendizaxe, recorrendo ao “talento”, xa que pretende a segregación temperá do alumnado, adiantando a elección de itinerario etiquétase aos centros educativos creando diferenzas de calidade.