Oleiros, 27 de outubro de 2014-. O Concello de Oleiros levará a cabo ata finais do próximo mes de novembro unha campaña de recollida de produtos de hixiene e limpeza destinados ao Banco Solidario do Voluntariado de Oleiros. Esta iniciativa ponse en práctica a través da Rede Municipal de Bibliotecas que servirá de punto de depósito.
Durante este outono, o Voluntariado de Oleiros quere dar a coñecer un dos seus proxectos máis emblemáticos, o Banco Solidario, co fin de iniciar unha campaña de divulgación da súa actividade así como recoller produtos de hixiene e limpeza para aquelas familias en situación máis desfavorecida.
Todas aquelas persoas interesadas en colaborar nesta campaña poden levar ás bibliotecas municipais estes produtos e participar nesta actividade solidaria. Estes produtos, repartidos a través do Banco Solidario, teñen como obxectivo completar o apoio que se lles presta ás familias a través das axudas económicas e de alimentos prestadas polos Servizos Sociais.
Non será esta a única colaboración entre o Voluntariado de Oleiros e as bibliotecas, xa que a próxima semana vaise iniciar un servizo de apoio para que as persoas con dificultades para desprazarse poidan acceder igualmente aos fondos bibliográficos.