Oleiros, 17 de xaneiro de 2018-. O Concello de Oleiros procedeu a limpar subsidiariamente a maleza das parcelas urbanas situadas na Urbanización A Pezoca, ante as denuncias dos veciños e veciñas da zona e o elevado risco de incendio. A inmobiliaria propietaria das fincas negábase a realizar a limpeza do terreo, polo que o Concello pasaralle a correspondente factura dos gastos ocasionados.
Todos os veciños e veciñas do municipio teñen a obriga de manter limpas e libres de maleza as súas propiedades, tal e como recolle a Ordenanza municipal de limpeza e a Lei de ordenación urbanística do medio rural de Galicia. As persoas propietarias dos inmobles e soares teñen o deber de mantelos nas debidas condicións de hixiene, salubridade, seguridade, limpeza e ornato público. O incumprimento desta normativa pode xerar sancións económicas de carácter coercitivo comprendidas entre os 300 e os 6.000 euros.