Manuel Gerena interpretou algunhas das súas cancións máis destacadas, nunha actuación na que o flamenco, a poesía e a reivindicación social se deron a man. A súa voz e a forza das súas letras converteron o concerto nunha homenaxe á liberdade, á dignidade humana e a todas as persoas que loitaron por conquistar e preservar os dereitos democráticos.
O artista sevillano é unha figura histórica do flamenco comprometido. Durante a ditadura franquista, a súa música e as súas posicións políticas provocaron a censura e a persecución das autoridades, mais nunca renunciou a utilizar a súa arte para denunciar as inxustizas e defender os dereitos das clases populares.
O público da Fábrica puido gozar así dunha noite de música e memoria, cun artista que mantén intacto o seu compromiso coa cultura, a xustiza social e as liberdades democráticas.