Oleiros, 24 de outubro de 2011-. O Goberno local de Oleiros reunirase mañá cos representantes das distintas entidades veciñais, culturais, educativas e deportivas do municipio para presentarlles o documento que recompila a proposta do executivo local para os orzamentos do próximo exercicio. Esta reunión, que terá lugar na casa Charry, contará coa presenza do alcalde, Ángel García Seoane. Durante a sesión informarase de forma pormenorizada dos distintos capítulos do orzamento e farase especial fincapé nas partidas destinadas a financiar os servizos sociais, culturais, educativos e deportivos do municipio.
A convocatoria dos colectivos veciñais do municipio para a presentación dos orzamentos anuais realízase cada ano por parte do Goberno local de Alternativa dos Veciños. A través desta iniciativa o executivo local pretende elaborar uns orzamentos máis participativos. Con anterioridade a esta convocatoria, o Goberno local dirixirase por carta aos colectivos de maior entidade para solicitar as súas propostas de cara a confeccionar o documento que agora se presenta.