Publicouse na Plataforma de Contratación do Sector Público a licitación relativa ao Servizo de xardinería e mantemento de zonas verdes do Concello de Oleiros. Trátase dun servizo público obrigatorio de competencia municipal, de acordo con o artigo 26.1 da Lei 7/1985 do 2 de abril reguladora das Bases de Réxime Local (LRBRL).
O Concello de Oleiros conta cunhas 164 zonas verdes a manter e que abranguen unha superficie de aproximadamente 800.000 m² distribuídos en 72 parques, xardíns e zonas verdes; ademais de contar cun gran número de árbores nas vías de titularidade municipal que se engaden a aquel arboredo propio das zonas verdes.
A licitación divídese en 3 lotes dada a grande extensión de superficie do conxunto de zonas e coa finalidade de promover a concorrencia e aumentar deste modo a eficiencia do contrato.
Nos traballos sinalados nos pregos técnicos do servizo de xardinería e mantemento de zonas verdes do Concello de Oleiros están incluídos a rega, sega do céspede, semente, recorte e perfilado de bordos, escarificado e aireado, fertilización e tratamentos herbicidas, fitosanitarios (picudo vermello, nemátodo do piñeiro, procesionaria, típula...), poda de arbustos, conservación de xardineiras e estudo de árbores en mal estado, ademais das preceptivas podas, reposicións e eliminación de maleza.
O importe da licitación é de 6.130.029,01€ para unha duración de catro anos máis unha posible prórroga dun ano. O prazo de presentación de ofertas finalizará o próximo 27 de maio.