Oleiros, 9 de novembro de 2020-. Xa están abertas as dúas novas Casas da Mocidade, concibidas para ofrecer alternativas de ocio e lecer á mocidade de todo o municipio. Todos os mozos e mozas maiores de 14 anos poden comezar a visitar estes locais, para coñecer as instalacións e informarse sobre o seu funcionamento, que estarán dispoñibles de luns a sábado en horario de tarde.
A partir da fin de semana comezarán a desenvolverse as primeiras actividades, en grupos reducidos, tal e como permiten e estipulan as autoridades autonómicas. O persoal de ambos centros, ademais das tarefas de dinamización, monitorización e información, velará polo estrito cumprimento das normas sanitarias.
As Casas da Mocidade atópanse no centro de Santa Cruz, na rúa Daniel Castelao, e en Montrove, na antiga Escola das Pedras, onde se atopaba a sede do Servizo Municipal de Emerxencias e Protección Civil.