Oleiros, 8 de outubro de 2012-. O Concello de Oleiros comezará de inmediato os traballos de mellora da rúa Pilar Estévez Diéguez, situada na parroquia de Nós. Na actualidade a dita rúa, ten aplicado un aglomerado asfáltico presentando numerosos desgastes en distintos puntos desta e o obxectivo destes traballos que contan cun orzamento de 130.000 euros é mellorar o firme e realizar diversos traballos de mellora da seguridade viaria para os peóns.
O proxecto prevé o ensanchamento de calzada. Ademais, sanearanse aquelas zonas nas que, debido á execución de gabias para redes de servizos realizadas con anterioridade a estas obras, se atopen en mal estado. Así mesmo, en toda a vía se procederá ao recrecido dos pozos e arquetas dos servizos ata a cota da nova rasante e mellora da rede de pluviais.
Mellora da seguridade viaria
En canto á mellora de seguridade viaria construiranse beirarrúas no único tramo da calzada no que non existen. Ademais co fin de dar continuidade a un itinerario peonil na rúa Pilar Estévez Diéguez e na súa confluencia coa rúa A Seara, procederase á execución destas no dito tramo.