Oleiros, 17 de setembro de 2015-. XOVENFORMA é o Programa Xuvenil de Actividade Física para a Saúde do Concello de Oleiros co que se pretende fomentar a práctica de actividade física entre os mozos e mozas que se atopan fóra do eido federativo e competitivo. Os complexos deportivos de Perillo, Oleiros e Dorneda acollerán desde o 1 de outubro e ata o 30 de xuño as clases de cardio, tono e zumba que forman este programa.
Baixo a denominación de “cardio” se agrupará a actividade cardiovascular orientada á mellora da resistencia aeróbica a través de actividades como o bike indoor, bodybox ou step. Outra das clases permite participar en actividades de tonificación de baixa intensidade orientadas á mellora do ton corporal xeral. A terceira das actividades que oferta XOVENFORMA é zumba, unha actividade coreografiada de base música actual adaptada para a idade xuvenil.
O prazo de inscrición xa está aberto para todos os mozos e mozas de entre 12 e 18 anos e será por rigorosa orde de chegada. As inscricións poderán realizarse nas oficinas do Servizo Municipal de Deportes do Centro Municipal da Fábrica, ou ben nos seguintes correos j.rodriguez@oleiros.org ; a.monteagudo@oleiros.org. O prezo é de 5 euros mensuais para os empadroados e empadroadas no concello e 8,50 euros para os e as non empadroados e empadroadas.
Coa posta en marcha deste programa, o Concello de Oleiros pretende dar resposta á demanda de actividade física para a saúde en idade xuvenil, xerar unha dinámica de actividade física para consolidar hábitos deportivos en idades entre 12 e 18 anos, evitar o abandono da práctica deportiva na etapa adolescente, crear alternativas de práctica deportiva fóra do campo do deporte de competición e deporte federado e establecer ambientes de socialización ao redor da actividade física. As sesións coincidirán sempre co calendario escolar.
PINCHA AQUÍ PARA DESCARGAR O PROGRAMA: HORARIOS E FOLLA DE INSCRICIÓN