Oleiros, 2 de marzo de 2018-. Nun auditorio da Fábrica ateigado de xente presentouse o programa de excursionismo e sendeirismo de maiores do Concello de Oleiros Ven e Descubre 2018. A orixe oleira do topónimo do Concello de Oleiros será o fío condutor do programa e o nexo común entre todos os lugares que se visitarán tanto no excursionismo como en sendeirismo.
Vilas cun pasado común a Oleiros, con tradición oleira, con tradición artesanal e industrial coa cerámica, así como lugares co mesmo topónimo. Paisaxe e natureza, historia, cultura, artesanía… historia viva arredor do topónimo Oleiros por toda Galicia e incluso Portugal, destino das rutas de sendeirismo de fin de semana. Un total de 18 excursións, con 1.800 prazas, e 12 rutas de sendeirismo con 540 prazas, ás que hai que engadir as dúas fins de semana de sendeirismo con 40 prazas cada unha delas, fan unha oferta total de 2.420 prazas para todas as actividades desenvoltas no Ven e Descubre 2018 do Concello de Oleiros.
Todas as persoas maiores de 60 anos empadroadas no Concello de Oleiros están invitadas a participar neste programa. Os folletos informativos poderán atopalos nos edificios municipais e casas do pobo. Máis información, como sempre, no teléfono de atención ao veciño 981 610 000.