Oleiros, 11 de febreiro de 2014-. A Concellería de Servizos Sociais do Concello de Oleiros pon en marcha o Programa Creando o noso mapa, unha serie de actuacións previstas no I Plan para a Igualdade de Trato e non Discriminación entre Mulleres e Homes (2011-2015) que teñen como obxectivo o fortalecemento das mulleres en todos os ámbitos, traballando as emocións e o seu benestar físico a través da expresión corporal e as artes.
Esta programación iniciase con dous obradoiros:
Obradoiro de desenvolvemento emocional: unha actividade deseñada para mulleres, que se atopen nun proceso de cambio positivo, desexando tomar decisións sobre o seu proxecto de vida, pero que se atopen con atrancos polos seus sentimentos de inseguridade, indefensión, medo, angustia... Empeza o próximo 24 de febreiro, desenvolverase ao longo de 8 sesións todos os martes de 11:00 a 13:00 na Fábrica, en Santa Cristina.
Obradoiro do corpo: trátase dunha actividade corporal, pensada só para mulleres, que pretende crear hábitos de actividade física e de vida saudables, contribuíndo a revalorizar a súa imaxe. Iniciase o 25 de febreiro e desenvolverase todos os mércores do ano, menos en xullo e agosto, na Casa da Cultura en Perillo de 10:00 a 11:00 h.
Estes dous obradoiros teñen prazas limitadas e son gratuítos, para participar neles teñen que inscribirse previamente a través do teléfono de atención ao veciño do Concello de Oleiros, no 981 610 000, ou ben nas propias oficinas do Departamento de Servizos Sociais.
Ambas actividades desenvolvéronse en anos anteriores de forma experimental para colectivos moi concretos obtendo moi bos resultados e beneficios todas as persoas participantes, polo que se decidiu abrilos e darlle a posibilidade de participar a todas aquelas veciñas de Oleiros que estean interesadas.
Serán impartidos por profesionais cunha importante traxectoria e experiencia profesional que avalan a calidade e o formato destas actividades.
Unha destas actividades, o obradoiro do corpo, foi unha experiencia que se iniciou hai dous anos a través dunha colaboración coa Facultade de Ciencias da Educación e do Deporte en Bastiagueiro, e visto o seu éxito decidiuse apostar por incorporala á programación estable das actividades de Servizos Sociais.