Oleiros, 28 de marzo de 2012-. O Concello de Oleiros inaugurou esta mañá o edificio que alberga as novas oficinas do Departamento de Servizos, situada na rúa do Río, nas inmediacións do complexo municipal alí situado e que funciona como centro de traballo e loxística dos servizos municipais. Ao acto acudiu o alcalde, Ángel García Seoane, quen destacou a importancia desta nova instalación debido ao crecemento exponencial que tivo o traballo do Departamento de Servizos propiciado polo desenvolvemento urbanístico e incremento da poboación experimentado por Oleiros ao longo dos últimos anos.
As novas oficinas, de 140 metros cadrados de superficie, contan con catro despachos, recepción e atención ao público. Así como sala de xuntas e varias zonas de traballo. Nelas desenvolverán a súa actividade os concelleiros de Servizos Municipais e Ornato, Parques e Xardíns xunto con seis integrantes do departamento. O Concello inverteu un total de 60.000 euros na rehabilitación desta edificación, na que se substituíu a cuberta por unha nova e dotouse de calefacción, rede de datos, etcétera. Ademais urbanizouse tanto o acceso, que queda como praza pública, como a zona verde traseira.
As obras realizáronse de forma conxunta pola empresa adxudicataria da obra e polo persoal propio de Servizos Municipais. Nos traballos de axardinamento colaborou unha brigada de inserción sociolaboral do Consorcio As Mariñas.