Oleiros, 26 de xuño de 2013-. O Concello de Oleiros celebrará mañá ás 20 horas na Casa Charry a sesión plenaria correspondente ao mes de xuño. No pleno deste mes debateranse temas de interese para o municipio entre os que destacan a aprobación do documento refundido do Plan Xeral. A aprobación deste documento permitirá recoller no texto regulador do urbanismo municipal a afección da pegada sonora do aeroporto de Alvedro, que se reduce considerablemente en relación á marcada anteriormente polo Ministerio en 2009.
Ademais debaterase a posibilidade de solicitar ao Goberno autonómico que retire a concesión de estación de servizo de combustible á gasolineira situada no centro de Santa Cruz e a concesión de subvencións ás entidades S.C.R.D. Dorneda, Mariño de Mera C.F. e At. San Pedro, para sufragar os gastos derivados do consumo enerxético e fornezo de auga correspondente a este ano. Esta iniciativa tómase para non xerar un agravio comparativo co resto de entidades do municipio, xa que estes tres clubs desenvolven a súa actividade en campos privados e non en equipamentos públicos como o resto de entidades deportivas do municipio.