Oleiros, 15 de novembro de 2019-. A Deputación da Coruña comunicou ao deputado e alcalde de Oleiros Ángel García Seoane a contestación do Ministerio de Fomento á moción presentada no pleno do pasado 25 de outubro. Nesa moción, o alcalde reclamaba que a Deputación, como titular da rúa do Areal que enlaza coa N-VI en Sol y Mar, reabrise o tráfico tal e como se atopaba antes das obras do colector da avenida Che Guevara.
No documento recibido pola Deputación, o Ministerio de Fomento informa de que o proxecto do enlace de Sol y Mar foi aprobado o pasado 2 de agosto e que actualmente a atópase en tramitación a licitación das obras. Por ese motivo aconsellan manter o actual funcionamento da intersección, sen semáforos, ata o comezo das obras.
“Que casualidade que o Ministerio de Fomento respondera á moción que presentei na Deputación, pedindo as obras en Sol y Mar, o mesmo día que iniciamos a acampada. O que se nos comunica é que o proxecto está aprobado desde o 2 de agosto –que xa o sabíamos- e que está en trámite para a súa contratación. Pero o que hai é que iniciar a licitación, porque en trámite xa leva anos”, dixo Ángel García Seoane.