Oleiros, 04 de novembro de 2016-. O próximo mércores 9 de novembro ás 20:00 horas no auditorio da Fábrica vai ter lugar a Mesa Redonda “Mulleres no Deporte”, un acto co que se inicia a programación das distintas actividades que no mes de novembro se van desenvolver en Oleiros relacionadas coa igualdade e contra a violencia de xénero. No acto proxectaranse parte dos documentais elaborados pola Área de Benestar Social, Educación e Políticas de Igualdade da Deputación da Coruña que, baixo o título “Contra os elementos”, que pretenden visualizar o deporte feminino galego e os seus triunfos, desmontar os prexuízos de xénero, apoiar os deportes minoritarios e promover valores como a superación e o esforzo.
Algunhas das participantes na mesa redonda protagonizan os documentais deste proxecto. Mª José Mosquera, profesora da Facultade de Ciencias do Deporte e a Educación Física, participa no documental titulado “O futuro”, no que achega unha perspectiva sociolóxica á visión do deporte feminino. Mónica Castelo, veciña de Oleiros, xogadora do CRAT de Rugby e recentemente proclamada campioa de Europa de Rugby, protagoniza o titulado “Lume”, no que repasa a súa experiencia e vivencias na práctica de deportes como o remo e o rugby visibilizados tradicionalmente como masculinos.
Asemade intervirá Mª Luisa Armesto, tamén veciña de Oleiros, atleta pioneira no atletismo feminino, campioa de España en varias ocasións, e na actualidade desenvolvendo un importante papel de dinamizadora de mulleres na práctica do deporte no Club Atletismo Sada.
A mesa será dirixida e moderada por Cristina López Villar, profesora da Facultade de Ciencias do Deporte e a Educación Física, colaboradora e impulsora de actividades conxuntas co Concello de Oleiros no desenvolvemento do seu Plan de Igualdade.
O obxectivo da mesa redonda é analizar a visión que hai do deporte feminino na sociedade, cal é o papel que xogamos todos e todas nos prexuízos existentes, así como valorar a contribución que achega a práctica deportiva ao benestar individual, ao equilibrio emocional e un maior nivel de autoestima e confianza.
Unha mesa redonda do máis interesante que inicia diversos actos que se van desenvolver no Concello de Oleiros ao longo deste mes de novembro.