Oleiros, 21 de xaneiro de 2016-. Este ano o Entroido madruga, sen tempo a rematar cos excesos das festas do Nadal, aínda sen dixerir os turróns e as sobremesas desa época, xa nos atopamos, sen darnos conta, rodeados de filloas, cachuchas, chourizos... No Concello de Oleiros, o día grande do Entroido será o venres 12 de febreiro, despois do Martes de Entroido e xusto o día anterior ao Sábado de Piñata.
Ese venres, na polideportiva Arsenio Iglesias de Santa Cruz, a carón do colexio Parga Pondal, a partir das 19:00 horas, empezará a tradicional festa do Entroido, con actuación musical, chocolatada, concurso de disfraces e a espectacular actuación sorpresa.
Este ano repartiranse case 4.000 euros en premios aos mellores disfraces individuais e colectivos nun concurso que é unha das referencias na comarca coruñesa. Tanto na categoría de grupos como individual haberá un primeiro premio, un segundo e dous terceiros. Ademais, como novidade, creáronse tres accésits, un en grupos e outros dous en individual, cun importe igual aos terceiros premios, para que o xurado poida premiar aqueles disfraces que sexan merecedores dalgunha mención especial pola súa participación, enxeño...
Agardamos o 12 de febreiro en Santa Cruz a todo o mundo que teña ganas de pasalo ben e de participar nesta marabillosa e divertida festa. O Entroido xa está aquí, toca disfrazarse!
BASES DO CONCURSO DE DISFRACES