Oleiros, 28 de setembro de 2011-. O Concello de Oleiros, a través da rede de bibliotecas municipais, pon en marcha a tempada de Tertulias Literarias e os Talleres de Lectura. Estas actividades, destinadas á mocidade e ás persoas adultas, levaranse a cabo de forma regular na Biblioteca Central Rialeda de Perillo e na Biblioteca Municipal Rosalía de Castro de Santa Cruz. Durante as sesións realizaranse comentarios de obras de distintos xéneros literarios, principalmente narrativa contemporánea, pero tamén se lerá poesía, teatro e ensaio, nun ambiente distendido procurando os lados formativos e lúdicos da lectura.
O principal obxectivo é animar a ler a través da propia lectura, gozar da literatura como un desenvolvemento da capacidade de creación e comunicación, de maneira que compartindo ideas, reflexionando sobre temas diversos poidamos enriquecernos cos diferentes puntos de vista. Preténdese ir descubrindo a maneira de escribir de cada autor ou autora, os distintos estilos, o tipo de linguaxe que utiliza e analizar os textos escritos, os procedementos e características máis importantes de cada obra.
Na Biblioteca Central Rialeda, en Perillo, levaranse a cabo quincenalmente, os mércores, ás 17.30 horas, con dous grupos de 20 persoas cada un deles. Nesta biblioteca comezarán hoxe 28 de setembro o grupo B e o 5 de outubro o grupo A. Na Biblioteca Municipal Rosalía de Castro de Santa Cruz serán quincenalmente, os luns, ás 18.30 e comezarán o próximo18 de outubro.
Ao longo das sesións iranse prestando diferentes libros de autoras e autores da literatura galega, española e internacional a cada participante, por este motivo é totalmente imprescindible que as persoas interesadas en participar se inscriban nalgunha das dúas bibliotecas, para poder ter dispoñibles os exemplares necesarios de cada título.
Algunha das lecturas programadas son:
- La cena de Herman Koch
- Tierra desacostumbrada de Jhumpa Lahiri
- Non hai noite tan longa de Agustín Fernández Paz
- El pájaro espectador de Wallace Stegner
- La Regenta de Leopoldo Alas “Clarín”
- Entre la bruma de Simonetta Agnello Hornby
- Retahilas de Carmen Martín Gaite
- El día antes de la felicidad de Erri de Luca
- Tertulia de Xavier Alcalá
- Cien años de soledad de Gabriel García Márquez
- La ladrona de libros de Marcus Zusak