Oleiros, 7 de novembro de 2011-. O Concello de Oleiros organiza, dentro do Programa Convivir coa demencia, unha mesa redonda que tratará o impacto familiar ante un diagnóstico de demencia. O acto terá lugar mañá martes día 8 de novembro ás 18.30 horas nas Torres de Santa Cruz.
O obxectivo desta actividade é fomentar a comunicación entre os diferentes axentes que interveñen no contorno dunha persoa diagnosticada con demencia e reflexionar sobre o impacto que se produce no entorno familiar cando un dos seus membros recibe este diagnóstico. A participación de profesionais da saúde ofreceranos a oportunidade de coñecer mellor os procesos que interveñen na enfermidade, que debemos ter en conta á hora de coidar o enfermo.
Así mesmo, afondarase no coñecemento das necesidades do coidador para manter un bo estado de saúde física e emocional. As experiencias dos familiares e as asociación de familiares achegará unha mirada reflexiva desde a convivencia co enfermo. A través dos talleres impartidos por profesionais do servizo de axuda no fogar e centro de día, os coidadores e as coidadoras poderán coñecer procedementos prácticos e técnicas que lles axuden a adquirir habilidades necesarias para realizar un mellor coidado.
O Concello de Oleiros vén desenvolvendo desde o ano 2009 un programa de apoio a coidadores e coidadoras co obxectivo de prestarlles apoio e axudarlles a coidar e coidarse mellor. Para conseguir este obxectivo o Goberno local traballa desde catro áreas de intervención: o estudo das necesidades dos coidadores, o proceso de descubrimento e coidado das emocións, a sensibilización e formación e o apoio a colectivos.
Participantes:
Presentación. D.Ignacio Crespo López, concelleiro de Servizos Sociais, Sanidade e Consumo do Concello de Oleiros.
"Que é a demencia?", D. José Marey López. Neurólogo do Complexo Hospitalario Universitario da Coruña.
"Coidar o coidador e a coidadora", D.Juan Bonome. Psicólogo da asociación AFACO e dos talleres “Descubrindo emocións” do Concello de Oleiros .
"O meu familiar ten demencia", dona Josefa Pérez Collazo. Familiar e membro do grupo de apoio a coidadores e coidadoras do Concello de Oleiros “Descubrindo emocións”.
"Recursos de apoio", dona María del Carmen Martínez Pulleiro. Presidenta da Asociación de enfermos de Alzheimer da Coruña."