04 de Xaneiro de 2011
Segundo o convenio asinado entre a Consellería de Sanidade e o Concello de Oleiros en 2008 a Xunta de Galicia debería facerse cargo do mantemento dos centros de saúde do municipio ao longo de 2009
Oleiros, 3 de xaneiro de 2011-. O Concello de Oleiros deixou de financiar o mantemento do centro de saúde de Santa Cruz e do punto de atención de urxencias o pasado 31 de decembro, data na que expiran os contratos dos distintos servizos dos que se ocupa e que supoñen un gasto anual ás arcas municipais superior aos 60.000 euros.
Segundo o convenio asinado entre a Consellería de Sanidade e o Concello de Oleiros en 2008 a Xunta de Galicia debería facerse cargo do mantemento dos centros de saúde do municipio ao longo de 2009. Coa entrada do actual Goberno autonómico impediuse que este convenio se cumprise segundo o establecido e a Xunta recepciona única e exclusivamente o punto de atención primaria de Perillo alegando problemas administrativos do Concello coa cesión do solo do centro de saúde de Santa Cruz para non recibilo.
Os servizos dos que se ocupaba o Concello son o servizo de ascensores, os extintores contra incendios, o mantemento de zonas verdes e os recibos de gas e electricidade. Ademais ata o pasado mes de agosto o Goberno local fíxose cargo do servizo de limpeza que deixou de financiar ao expirar o contrato en vigor, sen que a Xunta aboe á empresa encargada da tarefa aínda as facturas dos últimos meses.